Sumqayıtda dəm qazından zəhərlənən və virus aşkarlanan ailədəki uşaqların son durumu açıqlanıb.
Bu barədə Sumqayit24.az-ın sorğusuna cavab olaraq Sumqayıt Tibb Mərkəzi və Respublika Pediatriya Mərkəzindən məlumat verilib.
"Dəqiqləşdirilməmiş virus meninqoensofalit diaqnozu təyin edilən 2 nəfərin vəziyyəti orta ağır qiymətləndirilir. Yoluxucu xəstəliklər şöbəsində müalicəsi davam etdirilən 2 nəfərin vəziyyəti qənaətbəxş qiymətləndirilib və ambulator müalicə üçün evə buraxılıb", - məlumatda bildirilib.
Qeyd olunub ki, Respublika Pediatriya Mərkəzinin nəzdindəki Ə.F.Qarayev adına Uşaq Klinik Xəstəxanasında müalicəsi davam etdirilən və meninqoensofalit diaqnozu təyin edilən 1 nəfərin (qadın cinsli) vəziyyəti isə ağır stabil qiymətləndirilir.
Qeyd edək ki, aprelin 1-də Sumqayıt şəhəri, H.Zeynalabdin qəsəbəsində bir ailədə 6 nəfər dəm qazından zəhərlənib. Ailənin bütün üzvləri evə buraxıldıqdan sonra dəqiqləşdirilməmiş virus infeksiyası diaqnozu ilə yenidən xəstəxanaya yerləşdiriliblər. Aprelin 3-də uşaqlardan biri ölüb.
