Rusiyadan olan tələbələr Sumqayıt şəhərinə gəliblər.
Sumqayit24.az xəbər verir ki, Rusiyanın Moskva Dövlət Universitetinin Coğrafiya fakültəsinin Elm və Təhsil Nazirliyinin akademik Həsən Əliyev adına Coğrafiya İnstitutunda qonaq olan müəllim-tələbə heyəti Xəzər dənizinin Azərbaycan sahillərinin müasir vəziyyətini öyrənmək məqsədilə Sumqayıta səfər edib.
Qonaqlar institutun aparıcı elmi işçiləri, dosentlər, elmi katib Səidə Zeynalova və Elina Kərimovanın müşayiəti ilə Sumqayıt Kimya Sənaye və Texnologiyalar Parkında olublar.
Azərbaycanlı alimlər onlara bu parkların yaranma tarixi, mövcud vəziyyəti, tərkibinə daxil olan müəssisələr və istehsal olunan məhsullar barədə məlumat veriblər.
Sonra qonaqlar Sumqayıtın Xəzər sahilinə yola düşüblər. Burada onlar sahil xəttinin bugünkü vəziyyətini və dəniz səviyyəsinin aşağı düşməsinin nəticələrini müşahidə ediblər.
S.Zeynalova və E.Kərimova ziyarətçilərə Xəzər dənizinin səviyyəsində baş verən enmə və qalxma mərhələləri, onların səbəbləri, dəniz səviyyəsinin azalmasının iqtisadi və ekoloji nəticələri, bu proseslərin sahil infrastrukturuna, sənaye və əhalinin həyatına təsiri, həmçinin hökumət tərəfindən görülən tədbirlər haqqında məlumat veriblər, onların suallarını cavablandırıblar.
