Elm və təhsil naziri Emin Əmrullayev 7 yaşlı uşağın ölümünün çox təəssüf doğuran hadisə olduğunu bildirib. Bu haqda 4 may tarixində Sumqayıt24 Report.az-a istinadən xəbər verir.
Nazir jurnalistlərə açıqlamasında bildirib ki, hadisə bir fərdin cinayət ehtimalı daşıyan davranışı ilə əlaqədardır: "İnanmıram ki, bu hadisə bütün məşqçilərin, idmanın və idman zallarının fəaliyyətinə kölgə salacaq. Çünki sadəcə nazirliyin sistemində 60 mindən artıq şagird idmanla məşğul olur. İnanırıq ki, hüquq-mühafizə orqanları tərəfindən məsələyə müvafiq hüquqi qiymət veriləcək".
E. Əmrullayev Azərbaycan qanunvericiliyində məşqçi kimi fəaliyyət göstərmək üçün lisenziya tələb olunmadığına diqqət çəkib: "Hazırda sözügedən şəxs ötən ilin axırlarında işə qəbul olunub və qanunvericiliyin tələbi pozulmayıb. O, həm də ali təhsilli məşqçi, beynəlxalq turnirlərin qalibi və idman ustası kimi tanınan şəxs olub", - Əmrullayev bildirib.
O, həmçinin idman zalının icarəyə verilmədiyini deyib.
"Bu hadisədən çıxarılan dərs ondan ibarətdir ki, həm məktəblər, həm valideynlər, həm məşqçilər, həm də federasiyalar bu işə daha diqqətlə yanaşmalıdırlar. Mənim şəxsi fikrim budur ki, bu, bir şəxsin cinayət ehtimalı olan davranışı ilə bağlıdır və burada sistematik problem görmürəm", - E.Əmrullayev qeyd edib.
