Sumqayıtda 27 Sentyabr - Anım Gününə həsr olunmuş intellektual yarış keçirilib. Bu barədə 1 oktyabr tarixində şəhər Gənclər və İdman Baş İdarəsinə istinadən xəbər veririk.
“Zəfərin davamçıları” adlı milli ərazi intellektual yarışında müxtəlif sahələri təmsil edən gənclərdən ibarət 6 komanda iştirak edib.
Gərgin və maraqlı keçən turnirin sonunda 2 saylı Sumqayıt regional “ASAN xidmət” mərkəzinin “İkonik” və “Dəmir yumruq” komandaları müvafiq olaraq I və III, Gənclərin İnkişaf və Karyera Mərkəzinin “Cardinal” komandası isə II yeri tutublar.
Qalib komandalar 1 saylı Sumqayıt regional “ASAN xidmət” mərkəzinin kubok və sertifikatları, həmçinin Gənclər və İdman Baş İdarəsinin xatirə hədiyyələri ilə təltif edilib.
İntellektual oyunun keçirilməsində məqsəd Vətən Müharibəsi və Şanlı Zəfər tarixinin təbliği, gənclərdə vətənpərvərlik və milli-mənəvi dəyərlərimizə hörmət hisslərinin aşılanması,eləcə də asudə vaxtlarının səmərəli təşkili və dünyagörüşünün artırılmasıdır.
