Civəyə görə tutulan hərbçi və zərgərin şikayətinə baxılıb. Sumqayıt24 bu barədə 29 aprel tarixində Pravda.az-a istinadən xəbər verir.
Ali Məhkəmədə Sumqayıt şəhərində tutulan Müdafiə Nazirliyinin N saylı hərbi hissəsinin sabiq növbə rəisi Həsən Həsənovun (şərti) və tanışı Məmməd Məmmədovun (şərti) barəsindəki hökmdən verilən kassasiya şikayətinə baxılıb.
Hakim İlkin Rəcəbovun sədrliyi ilə keçirilən prosesdə şikayət təmin edilməyib.
Qeyd edək ki, hərbi hissələrin birində xidmət aparan 61 yaşlı Həsən Həsənov naməlum mənbədən əldə etdiyi 100 qrama yaxın civəni 15 min manata satmaq istəyib. Onunla birlikdə ötən ilin oktyabrında keçirilmiş əməliyyat zamanı Sumqayıtda zərgər kimi çalışan və civənin satışına vasitəçilik edən Məmməd Məmmədov da saxlanılıb.
Hər iki şəxs barəsində Cinayət Məcəlləsinin 240.2.1 və 240.2.2-ci (Güclü təsir edən və ya zəhərli maddələrin satış məqsədilə qanunsuz dövriyyəsi, bir qrup şəxs tərəfindən və təkrar törədildikdə) maddəsi ilə iş açılıb və 2021-ci il oktyabrın 23-də Bakı Hərbi Məhkəməsinin qərarı ilə həbs ediliblər.
