Sumqayıtda ali məktəblərə yüksək balla qəbul olan məzunlarla görüş keçirilib. Sumqayıt24 bu barədə 13 sentyabr tarixində Sumqayitxeber.com-a istinadən məlumat verir.
Tədbirdə şəhərin icra başçısı Zakir Fərəcov, Abşeron-Xızı Regional Təhsil idarəsinin müdiri İlhamə Abdullayeva, təhsil müəssisələrinin rəhbərləri, müəllimlər, ali məktəblərə yüksək balla qəbul olan məzunlar və fənn olimpiadalarında qalib olan şagirdlər iştirak ediblər. İcra başçısı çıxış edərək gəncləri təbrik edib, gələcək həyatlarında müvəffəqiyyətlər arzulayıb. Yığıncaqda bildirilib ki, bu il Sumqayıt məktəblərini bitirən şagirdlərdən 36 nəfər 650-dən yuxarı bal toplayıb. Təbiət Elmləri təmayüllü Gimnaziyanı, Texniki və təbiət elmləri liseyini, Təfəkkür və İstedad liseylərini bitirən şagirdlərin 100%-i ali məktəblərə qəbul olub. Region üzrə 17 nəfər orta məktəbi döş nişanı ilə bitirib ki, onların 16-sı Sumqayıtın payına düşür.
Səmərəli pedaqoji fəaliyyətinə görə bir qrup müəllimə İcra Hakimiyyətinin Fəxri Fərmanı təqdim edilib. Daha sonra fənn olimpiadalarının qaliblərinə, qəbul imtahanlarında yüksək bal toplayan məzunlara qiymətli hədiyyələr, həmin şagirdlərin təhsil aldıqları məktəblərin direktorlarına isə Təşəkkürnamələr təqdim olunub.
