Sumqayıtda yazıçı-publisist Hümbət Həsənoğlu ilə “Dərin düşüncəli novator insan” adlı görüş keçirilib. Bu barədə Sumqayıt24 3 oktyabr tarixində məlumat verir.
Tədbir Mərkəzi Uşaq Kitabxanasında 16 nömrəli tam orta məktəbin şagird və müəllim kollektivinin iştirakı ilə baş tutub. Yığıncaqda çıxış edən kitabxananın mütəxəssisi Səbinə Qasımova yazıçının həyat və yaradıcılıq yolu, çoxşaxəli fəaliyyəti haqqında məlumat verib. O, iştirakçıları yazıçının indiyədək nəşr edilmiş kitabları ilə tanış edib.
Sonra söz alan tədbirin fəxri qonağı, Sumqayıt Dostlar Klubunun sədri, ictimai xadim Hümbət Həsənoğlu uğur və müvəffəqiyyət qazanmağın sirləri barədə şagirdlərin çoxsaylı suallarını cavablandırıb, öz həyat təcrübəsini gənclərlə bölüşüb. O, çıxışının sonunda müəllifi olduğu iki adda səkkiz nüsxə kitabını və Sumqayıtın simvolu sayılan “Göyərçin” simvolik formasını xatirə hədiyyəsi olaraq kitabxanaya təqdim edib. Tədbirin sonunda müəllifin Sumqayıtdakı "Qalib əsgər" abidəsinə həsr etdiyi essesi əsasında hazırlanmış videoçarxın təqdimatı da həyata keçib.
