Oktyabrın 10-12-də güclü geomaqnit qasırğası baş verəcək.
Sumqayit24.az xəbər verir ki, bu barədə Bakı Dövlət Universitetinin Fizika fakültəsinin Astrofizika kafedrası məlumat yayıb.
Günəş aktivliyinin 11-12 oktyabr tarixinədək yüksək aktiv səviyyədə olacağı, eləcə də X alışmaların ola biləcəyi proqnozlaşdırılır. Yaranan Günəş qasırğaları (S1-S2 - nəzərə alınmayan-orta) oktyabrın 10-dək davam edəcək, sonrakı dövrdə fon səviyyəsinə enəcək. Həmin dövrdə Günəş küləyi parametrləri həyəcanlı vəziyyətdə olacaq.
Oktyabrın 10-11-də Yerin geomaqnit sahəsi həyəcanlanmış səviyyədə, geomaqnit aktivliyi göstərən əmsal isə 6-7 olacaq. Oktyabrın 10-dan 11-nə keçən dövrdə G4 (güclü) geomaqnit qasırğası olacağı proqnozlaşdırılır. Yerin maqnit sahəsinin təsirindən asılı olaraq geomaqnit sahəsi dəyişə bilər.
Qeyd edək ki, bu təbiət hadisəsi oktyabrda artıq ikinci dəfə müşahidə olunacaq.
