Azərbaycanda beynəlxalq təcrübəyə uyğun olaraq çevik iş vaxtı rejiminin tətbiqi planlaşdırılır. Bu, "Məşğulluq Strategiyasının həyata keçirilməsinə dair 2026–2030-cu illər üçün Tədbirlər Planı"nda öz əksini tapıb.
Əmək və Əhalinin Sosial Müdafiəsi Nazirliyinin məlumatına görə, bu model həftəlik 40 saatlıq iş normasını qorumaq şərtilə işçilərə işə başlama və bitirmə saatlarını müəyyən çərçivələr daxilində sərbəst seçmək imkanı verəcək.
Çevik iş qrafikinin iş və şəxsi həyat arasında tarazlığı yaxşılaşdıracağı, əmək məhsuldarlığını artıracağı bildirilir. Bu model daha çox informasiya texnologiyaları, maliyyə, təhsil, inzibati sahələr, həmçinin azyaşlı uşağı olan valideynlər, əlilliyi olan şəxslər, tələbələr və məsafədən çalışanlar üçün nəzərdə tutulur.
Nazirlik qeyd edib ki, 2026–2030-cu illərdə beynəlxalq təcrübə öyrəniləcək, hüquqi baza hazırlanacaq və çevik iş rejimi mərhələli şəkildə tətbiq ediləcək.
Mənbə: Apa.az
