İtkin düşən 7-ci sinif şagirdinin valideynləri təhsil müəssisəsindən narazıdırlar. Sumqayıt24 bu barədə 22 sentyabr tarixində ApaTV-yə istinadən xəbər verir.
Xəbər verdiyimiz kimi, Sumqayıt şəhər 1 nömrəli məktəbin şagirdi 12 yaşlı Nihat Pənahov srağagün dərsdən çıxaraq evə getməyib. O, saatlarla aparılan axtarış tədbirləri nəticəsində 45-ci məhəllədə tapılıb. Nihatın tapıldlığı ərazidə var-gəl etdiyi ətrafda olan müşahidə kamerasına da düşüb.
Nihatın valideynləri məktəb rəhbərliyinin uşağın itkin düşməsi barədə onlara məlumat vermədiyini və şagirdin dərs zamanı yoxa çıxdığını iddia edirlər.
Uşağın anası Zoya Pənahova deyir ki, Nihat epilepsiya xəstəsidir və o gün özündə deyildi. Buna görə onu hər gün özü dərslərə aparıb-gətirib. Bu dəfə isə oğlunu götürməyə gedəndə onun məktəbdə olmadığını bilib.
Abşeron-Xızı Regional Təhsil İdarəsinin əməkdaşı Səbinə Məmmədova bildirib ki, şagird özünü yaxşı hiss etmədiyi üçün icazə alaraq sinifdən çıxıb və geri dönməyib. Valideynlər və hüquq-mühafizə orqanları bundan dərhal məlumatlandırılıb. Məsələ ilə bağlı araşdırma aparılır.
