Sumqayıt şəhər Mərkəzi Uşaq Kitabxanasında “Sən məni oxumamısan” adlı əyləncəli mütaliə saatı keçirilib. Bu haqda 5 may tarixində Sumqayıt24 xəbər verir.
Kiçik yaşlı məktəblilərin yaz tətili günlərində asudə vaxtlarının səmərəli təşkili məqsədilə keçirilən yığıncaqda N.Tusi adına 12 nömrəli tam orta məktəbin 2r sinif şagirdləri iştirak ediblər.
Kitabxana mütəxəssisi Səbinə Qasımova kitabxanaların, mütaliənin rolu haqqında danışıb, məktəbliləri kitabxananın xidmət zalları, nağıl guşəsi ilə tanış edib, onlara mütaliə ilə bağlı öz tövsiyələrini verib.
Tədbir şagirdlərin rus uşaq ədəbiyyatının görkəmli nümayəndəsi Elena Blaqininanın 120 illik yubileyi münasibətilə hazırladıqları ədəbi təqdimatla davam edib. Şairənin tərcümeyi-halı və yaradıcılığı ilə tanışlıqdan sonra məktəblilər onun təbiət hadisələrindən, uşaq dünyasının sevinc və kədərindən bəhs edən şeirlərini söyləyiblər. Şeir oxunuşu mahnılar, rəqslər və əyləncəli oyunlarla müşayiət olunub.
Tədbir zamanı uşaqların məşhur nağıl qəhrəmanları haqqında bilgilərini, düşüncələrini öyrənmək məqsədilə viktorina təşkil edilib, onlarda rabitəli nitqin inkişaf etdirilməsi məqsədilə ucadan və sürətli oxu üzrə yarış keçirilib.
