Sumqayıt şəhər Mərkəzi Uşaq Kitabxanasında “Rəngli kağızların möcüzəsi” adlı ustad dərsi keçirilib. Bu haqda 18 aprel tarixində Sumqayıt24 Mədəniyyət Xəbərlərinə istinadən məlumat verir.
Yığıncaqda N. Tusi adına 12 nömrəli tam orta məktəbin 1k sinif şagirdləri iştirak ediblər. Kitabxananın mütəxəssisi Səbinə Qasımova uşaqlara müxtəlif heyvanlar, çiçəklər haqqında nağıllar, tapmacalar oxuyub, quşlar haqqında maraqlı məlumatlar verib və “Sehrli kisənin sakinləri” adlı oyuna dəvət edib.
Məktəblilərə təbii materiallar, rəngli kağızlarla işləməyin yolları və texnikası göstərilib. Uşaqlar valideynlərinin müşayiəti ilə işə başlayıblar. İlk dəfə belə bir texnika ilə işləyən balacalar rəngli kağız, qayçı, yapışqanın köməyi ilə çiçəklərdən, quşlardan ibarət maraqlı və gözəl kompozisiyalar hazırlayıblar.
