Məşhur meyxana ustasının səhhətində ciddi problemlər yaranıb. Sumqayıt24 bu barədə 13 sentyabr tarixində Bizim.media.az-a istinadən xəbər verir.
“Səhhətim heç yaxşı deyil. Hər iki ayağımı yara basıb və topuqlarım çürüyüb”, - bu sözləri meyxanaçı Mahir Cürət söyləyib. O, artıq piyada gəzə bilmədiyini açıqlayıb.
“Ayağımda kiçik yaralar var idi. O yaraları bilmədən qurdaladım və infeksiya saldım. Bundan sonra yara həm böyüdü, həm də çoxaldı. Artıq iki ilə yaxındır ki, ayaqlarımda yaralar var.
Həkimin yazdığı dərmanları qəbul etdim və qismən kömək oldu. Amma bir müddət sonra yenə eyni yaralar oldu. Bir sözlə, müalicənin effekti olmadı. Çox çətinliklə gəzirəm. Beş metr yol gedən kimi şiddətli ağrılarım olur. Piyada ümümiyyətlə gəzə bilmirəm”, - deyə meyxanaçı əlavə edib.
Mahir Rzabala oğlu Mirzəyev 1972-ci il mayın 20-də Coratda doğulub. O, “De gəlsin” meyxana yarışının iştirakçısı olub. 2022-ci ildə "Bitər həsrət" adlı kitabı işıq üzü görüb.
