Bu gün şəhid polkovnik Şükür Həmidovun doğum günüdür.
Şükür Nəriman oğlu Həmidov 1975-ci il aprelin 1-də Qubadlı rayonunun Armudlu kəndində doğulub. O, ailənin doqquzuncu övladı idi. Qubadlı rayonunun işğal edilməsindən sonra Həmidovlar ailəsi Sumqayıt şəhərində məskunlaşıb.
Şükür Həmidov 2016-cı ildə baş verən Aprel döyüşlərində Cəbrayıl rayonu istiqamətində yerləşən "Lələtəpə" strateji nöqtəsinin alınması zamanı xüsusilə fərqlənmiş, buna görə də Prezident İlham Əliyevin müvafiq Sərəncamına əsasən, Azərbaycanın Milli Qəhrəmanı adına layiq görülmüşdür. O, son 17 il ərzində sağlığında bu ada layiq görülən birinci şəxs olub.
2020-ci ilin sentyabr ayında başlayan Vətən müharibəsində polkovnik Şükür Həmidov Cəbrayıl, Füzuli və Qubadlıda gedən döyüşlərdə savaşıb. Oktyabrın 22-də isə doğulduğu və 18 yaşında didərgin düşdüyü Qubadlı rayonunun azadlığı uğrunda gedən döyüşlərdə həlak olub. II Fəxri Xiyabanda dəfn olunub.
Ölümündən sonra "Zəfər" ordeni, "Füzulinin azad olunmasına görə", "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.
