Sumqayıtın mərkəzində yerləşən və əhali arasında Nizami meydanı kimi tanınan ərazidə ciddi antisanitariya müşahidə olunur.
Bununla bağlı Sumqayit24.az-a müraciət edən şəhər sakinləri bildiriblər ki, ərazidə antisanitar vəziyyətin yaranmasının əsas səbəbi zibil qutularının çatışmazlığıdır. Onların sözlərinə görə, meydandan keçən insanlar istifadə etdikləri su şüşələrini və digər tullantıları atmaq üçün uyğun yer tapa bilmirlər.
Bəzi vətəndaşlar tullantıları özləri ilə aparsa da, bir çoxu zibil qutuları olmadığı üçün onları elə parkın ərazisinə atır. Nəticədə meydanın ayrı-ayrı hissələri zibilliyə çevrilərək şəhərin mərkəzi üçün xoşagəlməz mənzərə yaradır.
Vətəndaşlar aidiyyəti qurumlara müraciət edərək əraziyə kifayət qədər zibil qutularının yerləşdirilməsini və mütəmadi təmizlik işlərinin aparılmasını xahiş edirlər. Şəhərin ən çox istifadə olunan məkanlarından birinin bu vəziyyətdə qalması yolverilməzdir.
