Sumqayıt şəhərinin Hacı Zeynalabdin qəsəbəsində fəaliyyət göstərən Hacı Bəyverdi məscidinin sabiq axundu Taleh Sadıqov oğlunun şikayəti əsasında saxlanılıb.
Qaynarinfo.az-ın məlumatına görə, 1977-ci ildə Sumqayıt şəhərində anadan olan, ali təhsilli Taleh Sadıqov barəsində İnzibati Xətalar Məcəlləsinin 515.0.2-ci maddəsi (dini yığıncaqların, yürüşlərin və digər dini mərasimlərin təşkili və keçirilməsinin qanunla müəyyən edilmiş qaydalarının pozulması) ilə protokol tərtib edilib.
Məlum olub ki, Taleh Sadıqov barəsində tədbir oğlu Yavər Sadıqovun şikayəti əsasında görülüb. Yavər Sadıqov məhkəmədə ifadəsində əvvəllər namaz qıldığını, lakin sonradan bunu dayandırdığı üçün atası ilə münasibətlərinin gərginləşdiyini bildirib.
O, Rusiyada işlədikdən sonra Hacı Zeynalabdin qəsəbəsindəki evlərinə qayıtdığını, bundan sonra atasının dostları ilə birlikdə həyətlərində təxminən 15 nəfərin iştirakı ilə dini söhbətlər və görüşlər keçirdiyini iddia edib. Onun sözlərinə görə, bu vəziyyət onun narazılığına səbəb olub və nəticədə polisə müraciət edib.
Taleh Sadıqov isə oğlu ilə aralarında ailə-məişət zəmnində mübahisə yarandığını təsdiqləyib. Bu səbəbdən oğlu DİN-in 102 xidmətinə zəng edərək evdə dini tədbir keçirdiyini bildirib. Təqsirləndirilən şəxs bildirib ki, dinşünaslıq ixtisası üzrə təhsil alıb və 3 may və 11 may tarixlərində evində ziyalı dostlarını qonaq edib, onlara dini mövzularda sualları cavablandırıb. Onun sözlərinə görə, bu söhbətlər dini ayin deyil, elmi-müzakirə xarakteri daşıyıb.
Məhkəmənin qərarı ilə Taleh Sadıqov İnzibati Xətalar Məcəlləsinin 515.0.2-ci maddəsi ilə təqsirli bilinib və 1500 manat məbləğində cərimə edilib.
