Sumqayıt məktəbində məşhur idmançı ilə görüş keçirilib.
Sumqayit24.az xəbər verir ki, Azərbaycan Güləş Federasiyası (AGF) və Məktəbəqədər və Ümumi Təhsil üzrə Dövlət Agentliyi (MÜTDA) "Güləşlə sağlam yaşa" adlı birgə layihəyə start verib.
Təşəbbüs çərçivəsində ilk tədbir Olimpiya və ikiqat dünya çempionu Fərid Mansurovun iştirakı ilə Sumqayıt şəhər 7 saylı tam orta məktəbdə baş tutub.
Fərid Mansurovun idman yolundan bəhs edən videoçarx nümayiş etdirilib. Ardınca Olimpiya çempionu öz uğur hekayəsini bölüşərək karyerası boyu qarşılaşdığı çətinliklər və əldə etdiyi nailiyyətlərdən danışıb. O, məktəblilərə məqsədyönlü olmağı, daim öz üzərlərində çalışmağı və sağlam həyat tərzi seçməyi tövsiyə edib. Fərid Mansurov təhsilin, idmanla məşğul olmağın və düzgün qidalanmanın önəmini xüsusi qeyd edib.
Görüş çərçivəsində məktəblilərin iştirakı ilə sual-cavab sessiyası keçirilib. Şagirdlər qonağa müxtəlif suallar ünvanlayıb, onun tövsiyələrini dinləyiblər. Tədbirin maraqlı hissələrindən biri də "Kahoot" platforması üzərindən təşkil olunan intellektual müsabiqə olub. Qaliblər, o cümlədən ən maraqlı sualların müəllifləri AGF tərəfindən hədiyyələrlə təltif ediliblər.
Sonda Olimpiya çempionunun iştirakı ilə imza mərasimi keçirilib, məktəblilər xatirə avtoqrafları əldə edib və kollektiv xatirə şəkli çəkdiriblər.
