Son 1 ay ərzində Sumqayıt şəhərində piyadanın səbəb olduğu qəzalar çoxalıb. Buna misal olaraq mayın 5-də Cəfər Cabbarlı küçəsindəki hadisəni göstərmək olar. Piyada keçidi olmayan yerdən yolu keçən şəxsi maşın vurub. Digər bir hadisə ötən gün baş verib. Ərzaq daşıyan yük maşını arxaya hərəkət edərkən 3-cü sinif şagirdi Mehdi Məmmədovu vuraraq öldürüb.
Belə hallarda piyadada günah olsa da, yenə məsuliyyət sürücünün üzərinə düşür. Amma xarici ölkələrdə bu tip hadisələrdə qanun sürücünü məsuliyyətdən azad edir.
Maraqlıdır, qəzaya piyada səbəb olarsa, sürücü məsuliyyətdən azad oluna bilərmi?
Bununla bağlı Sumqayit24.az-a açıqlama verən hüquqşünas Ruslan Mustafazadə deyib ki, qanunvericiliyə görə nəqliyyat vasitəsi təhlükə mənbəyi hesab edilir:
“Bu mövzu kifayət qədər aktualdır. Məhkəmələrdə yol-nəqliyyat hadisələri ilə bağlı çoxlu işlər var. Bizim qanunvericiliyə görə nəqliyyat vasitəsi təhlükə mənbəyi hesab edilir. Sürücü də təhlükə mənbəyini idarə edən şəxs sayılır. Yəni yol-nəqliyyat hadisəsi zamanı xəsarət almış şəxs varsa, iki növdə ekspertiza təyin edilir: xəsarətin dərəcəsinin müəyyən edilməsi və hadisənin yaranma səbəbi.
Hər şey ekspertiza rəyinə əsaslanır. Əgər “sürücü hadisənin qarşısını alan zaman bütün texniki imkanlara malik olduğu təqdirdə bunu etməmişdir” deyə rəy verilərsə, sürücü günahkar hesab edilir. Zərərçəkən piyada keçidi olmayan yerdən keçsə belə. Amma qəzalarda piyadaların günahı istisna edilmir. Lakin bizdə bütün məsuliyyət sürücünün üzərindədir”.
Hüquqşünasın sözlərinə görə, artıq qanunvericiliyin bu hissəsinə dəyişiklik edilməsinə ciddi ehtiyac yaranıb:
“Çünki yol hərəkətinin təşkilində piyadalara qanunvericiliyin qaydalarını pozmadan yolda hərəkət etməli üçün bütün şərait yaradılıb. Bu şərait olduğu təqdirdə piyadanın yaradılmış vasitələrdən istifadə etməməsi səbəbində baş vermiş hadisə zamanı bütün məsuliyyətin sürücünün üzərinə qoyulması düzgün deyildir”.
Fidan İlqar
