Sumqayıtda qadın kişini şantaj edib. Sumqayıt24 bu haqda 26 yanvar tarixində Lent.az-a istinadən xəbər verir.
Elnur Ağayev (ad, soyad şərtidir) marşrut avtobusunda şəhər sakini Aysel Qurbanova (ad, soyad şərtidir) ilə üzbəüz əyləşib. Bu zaman Elnur qadının dayanmadan ona baxdığını görüb və tanış olmaq istəyib. Nömrəsini telefonunda yazaraq Ayselə göstərib. Qadın isə telefondakı nömrəni videoya çəkib.
Bundan sonra Aysel həmin görüntünü TikTok platformasında paylaşıb. Videonu silmək üçün Elnurdan WhatsApp vasitəsilə 500 manat pul tələb edib. Pulu verməyəcəyi təqdirdə WhatsApp statuslarından götürdüyü Elnurun övladlarının şəkillərini də TikTok-da rüsvayedici başlıqlarla paylaşacağını deyib. Kişi isə polisə müraciət edib.
Nəticədə Aysel Qurbanova şübhəli şəxs qismində saxlanılıb. Barəsində Cinayət Məcəlləsinin 182.1-ci maddəsi ilə cinayət işi başlanıb. İstintaq yekunlaşıb və baxılması üçün Sumqayıt Şəhər Məhkəməsinə göndərilib.
