Sumqayıtda yaşayış binalarının birində yaranan vəziyyət narahatlıq doğurur.
Sumqayit24.az-a daxil olan məlumata görə, 13-cü mikrorayon ərazisində yerləşən 64 saylı uşaq bağçasına aid bina hazırda son dərəcə təhlükəli və qəzalı vəziyyətdədir.
Narahatedici məqamlardan biri odur ki, bina hələ də fəaliyyət göstərir. Belə ki, 64 saylı bağçanın bir bölməsi körpələr evi kimi istifadə olunur. Digər hissəsində isə keçmiş məcburi köçkünlərdən ibarət 7 ailə məskunlaşıb. Eyni tikilidə həm uşaqların təlim-tərbiyəsi, həm də qəzalı şəraitdə yaşayan ailələrin gündəlik həyatı davam edir ki, bu da vəziyyətin ciddiliyini daha da artırır.
Keçmiş məcburi köçkünlərin sözlərinə görə, binanın vəziyyəti hər keçən gün daha da pisləşir.
"Tikilinin zirzəmisi tamamilə su ilə dolub, bu isə bünövrənin zəifləməsinə və binanın ümumi dayanıqlığının ciddi şəkildə azalmasına səbəb olur. Bundan əlavə, rütubət bütün mərtəbələrə yayılıb. Ailələrin yaşadığı otaqlarda divarlar nəmdən qaralıb, tavandan su damcılayır, döşəmələr isə deformasiyaya uğrayıb. Otaqlarda kəskin rütubət qoxusu hökm sürür", - deyə şikayətçilərdən biri bildirib.
Sakinlər bildirirlər ki, dəfələrlə aidiyyəti qurumlara müraciət etsələr də, problem hələ də həllini tapmayıb.
Şikayətçilər müvafiq qurumlardan binaya baxış keçirilməsini və problemin aradan qaldırılmasını tələb edirlər.
