Sumqayıtda Vətən müharibəsi şəhidinin anım günü keçirilib. Sumqayıt24 bu barədə 3 oktyabr tarixində Sumqayit.tv-yə istinadən xəbər verir.
Mərasim Sumqayıt Şəhidlər xiyabanında şəhid Elvin İsmayılovun məzarının ziyarəti ilə başlanıb. Burada İcra Hakimiyyətinin nümayəndələri, şəhid ailələri, qohumlar, qazilər iştirak ediblər. Tədbir iştirakçıları şəhidin məzarı önünə gül dəstələri düzüblər və ruhuna dualar oxuyublar. Daha sonra iştirakçılar mərasim evində təşkil olunan ehsan süfrəsinə qatılıblar və Elvinin doğulub böyüdüyü evi ziyarət ediblər.
Elvin İsmayılov 28 mart 2002-ci ildə Sumqayıt şəhərində anadan olub. O, Sumqayıt şəhər 24 nömrəli tam orta məktəbdə təhsil alıb. Təhsilini bitirdikdən sonra bir müddət müxtəlif sahələrdə çalışıb, sonra isə hərbi xidmətə yollanıb. İsmayılov 2 oktyabr 2020-ci ildə Füzuli rayonu istiqamətində döyüş tapşırığını yerinə yetirən zaman həlak olub.
Qeyd edək ki, şəhidimizin təhsil aldığı 24 nömrəli məktəb onun adını daşıyır.
