Sumqayıt Apellyasiya Məhkəməsində oğurluqda təqsirləndirilən Qafur Bəkirovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Rəşadət Ağayevin sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, Qafur Bəkirov 19 noyabr 2022-ci il tarixdə, saat 07:20 radələrində Səhiyyə Nazirliyinin Abşeron Rayon Mərkəzi Xəstəxanasının Saray Ailə Sağlamlıq Mərkəzinin hasarına bərkidilən 4 ədəd dəmir barmaqlığı çıxarıb və 1 ədəd dəmir xərəyi götürərək əmlakı gizli talayıb. O, ardınca isə saat 08:00 radələrində həmin xəstəxananın hasarına bərkidilən 18 ədəd dəmir barmaqlığı çıxarıb və 1 ədəd dəmir xərəyi götürərək ümumilikdə 2300 manat olan əmlakı ələ keçirib.
Bundan başqa, Qafur Bəkirov 25 yanvar 2023-cü il tarixdə, saat 03:00 radələrində Abşeron rayonu, Saray qəsəbəsində yerləşən evlərin birindən ümumilikdə 1430 manatlıq oğurluq edib.
Abşeron Rayon Məhkəməsinin hökmü ilə Qafur Bəkirov 2 il 1 ay 28 gün müddətinə azadlıqdan məhrum edilib.
