Saray qəsəbəsində minik avtomobilinin partlaması nəticəsində xəsarət alan şəxsin vəziyyəti açıqlanıb.
Sumqayit24.az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib ki, may ayının 7-də saat 11:30-da Respublika Təcili və Təxirəsalınmaz Tibbi Yardım Mərkəzinə Abşeron rayonu, Saray qəsəbəsindən yanğın baş verməsi səbəbilə çağırış qeydə alınıb.
"Çağırış ünvanına təcili tibbi yardım briqadası cəlb olunub. Təcili tibbi yardım briqadası tərəfindən 1995-ci il təvəllüdlü şəxs (kişi) üz nahiyəsinin termiki yanığı diaqnozu ilə Sumqayıt Tibb Mərkəzinin Təcili Tibbi Yardım Xəstəxanasına hospital olunub.
Üzün, boynun, hər iki saidin, əllərin arxa səthinin II-II dərəcəli yanığı diaqnozları təyin edilən pasiyentə Təcili tibbi yardım şöbəsində zəruri tibbi xidmətlər göstərilib. Daha ixtisaslı xidmət üçün Nərimanov Tibb Mərkəzinin nəzdindəki Yanıq Mərkəzinə təxliyə olunub.
Nərimanov Tibb Mərkəzinin nəzdində olan Yanıq Mərkəzində zəruri tibbi yardım göstərilən şəxsin vəziyyəti stabil qiymətləndirilib və ambulator müalicə üçün evə buraxılıb", - deyə məlumatda qeyd olunub.
***
Saray qəsəbəsində minik avtomobilində partlayış baş verib.
Sumqayit24.az-a daxil olan məlumata görə, "Saray-H" MTK-da binaların birinin həyətində "Chevrolet Cobalt" markalı avtomobilin sürücüsü maşını işə salmaq istəyən zaman nəqliyyat vasitəsi işlək vəziyyətə düşməyib.
Bu zaman avtomobildə qaz sızması baş verib və ani partlayış olub.
Partlayış nəticəsində sürücü üz və bədən nahiyəsindən yanıq xəsarətləri alıb.
Yaralı dərhal xəstəxanaya çatdırılıb.
Hadisə zamanı avtomobil tamamilə yararsız hala düşüb.
Faktla bağlı araşdırma aparılır.
