Saray qəsəbəsində həyat yoldaşına xəsarət yetirməkdə təqsirləndirilən Mahmud Mahmudov (adı, soyadı şərtidir) cinayət məsuliyyətindən azad edilib.
Məlumata görə, Abşeron Rayon Məhkəməsində hakim Abusət Qasımovun sədrliyi ilə keçirilən prosesdə iş üzrə qərar elan olunub.
Hadisə 15 mart 2026-cı il tarixdə saat 18 radələrində Saray qəsəbəsində yerləşən fərdi yaşayış evində baş verib.
Belə ki, Mahmud Mahmudov həyat yoldaşı, zərərçəkmiş Səkinə Mahmudovanın (adı, soyadı şərtidir) əvvəllər qızıl-zinət əşyalarını ehtiyatsızlıqdan itirməsini yenidən xatırladaraq ona irad bildirib. Bu səbəbdən tərəflər arasında mübahisə yaranıb. Bu zaman o, qadına yumruq vurub və itələyib.
Ekspertiza xəsarətləri sağlamlığın qısa müddətə pozulmasına səbəb olan yüngül xəsarət kimi qiymətləndirib.
Məhkəmədə zərərçəkmiş tərəf dəymiş ziyanın ödənildiyini, tərəflərin barışdığını və şikayətinin olmadığını bildirib.
Təqsirləndirilən şəxs də əməlindən peşman olduğunu deyib.
Məhkəmə tərəflərin barışmasını nəzərə alaraq onun cinayət məsuliyyətindən azad edilməsinə qərar verib. (Adlar şərtidir)
Mənbə: Pravda.az
