Sport24.az-da "Sumqayıt" klubunun baş məşqçi Saşa İliçlə bağlı qərarının dəqiqləşdiyi, "kimyaçılar"ın mövsümün sonunda serbiyalı mütəxəssislə vidalaşacağına dair iddialar yayılıb.
Həmçinin bildirilb ki, 48 yaşlı çalışdırıcının aylıq maaşının 25 min manat olması da gözləntiləri artırsa da, cari mövsümdə komandanın göstərdiyi nəticələr klub rəhbərliyini qane etmədiyi üçün baş məşqçinin başa çatan müqaviləsi yenilənməyəcək.
Sumqayit24.az məlumatların doğru olub-olmadığı dəqiqləşdirmək üçün "Sumqayıt" FK-ya sorğu ünvanlayıb. Komandanın mətbuat katibi Zaur Xudiyev yayılan iddiaları qismən təkzib edib:
"Saşa İliçin özünə də bununla bağlı mətbuat konfransında suallar verilib. Onun müqaviləsi onsuz da mövsümün sonuna qədər nəzərdə tutulub. Doğrudur, iki tərəf arasında müqavilənin daha 1 il uzadılması ilə bağlı bir şərti anlaşma var idi, amma bu, hər iki tərəfin razılığı olarsa, mümkün idi. Mövsümün sonuna yaxınlaşırıq, liqa tam bitəndən sonra rəhbərliklə Saşa İliç arasında görüş olacaq və tərəflər müqavilənin uzadılıb-uzadılmayacağına qərar verəcəklər.
Hazırda mətbuatda çıxan "Saşa İliçin mövsümün sonunda gedəcəyinə" dair xəbərlər onun 2-3 illik müqaviləsi olduğu halda əhəmiyyət daşıya bilərdi".
Zaur Xudiyev qeyd olunan maaş məsələsinə də toxunub. O bildirib ki, yazılan rəqəmlər, yəni 25 min manatlıq əməkhaqqı həqiqəti əks etdirmir.
