Sumqayıt Dövlət Universitetində (SDU) Çinin Shenzhen CET Electric Technology şirkətinin nümayəndələri arasında görüş keçirilib.
Sumqayit24.az xəbər verir ki, görüşün açılışında rektor Nurəli Yusifbəyli qonaqları salamlayaraq müasir sənaye texnologiyalarının ali təhsilə inteqrasiyasının və bu sahədə beynəlxalq əməkdaşlığın genişləndirilməsinin əhəmiyyətini vurğulayıb.
Şirkətin vitse-prezidenti Chen Kai universitetdə olmaqdan məmnunluğunu ifadə edərək görüşün qarşılıqlı təcrübə mübadiləsi və gələcək əməkdaşlıq imkanlarının dəyərləndirilməsi baxımından əhəmiyyətini qeyd edib. CET Electric Technology-nin Beynəlxalq Biznes Departamentinin satış direktoru Zhao Yan isə şirkətin fəaliyyəti və texnoloji həlləri barədə məlumat verib.
Qeyd edək ki, Çində fəaliyyət göstərən Shenzhen CET Electric Technology şirkəti elektrik enerjisinin idarə edilməsi, elektrik şəbəkələrinin mühafizəsi və monitorinqi, enerji ölçmə sistemləri, eləcə də rəqəmsal enerji idarəetmə həllərinin hazırlanması üzrə ixtisaslaşıb. Şirkətin məhsul və texnoloji həlləri sənaye müəssisələrində, enerji infrastrukturunda, binalarda və məlumat mərkəzlərində tətbiq olunur. CET Electric Technology Çin elektrik şəbəkəsində elektrik enerjisinin keyfiyyətinə nəzarət sistemləri üzrə təchizatçılar arasında ilk üçlükdə yer alır. Şirkət, həmçinin "ağıllı şəbəkə" enerji məlumat sistemləri sahəsində Çinin üçüncü ən böyük yerli təchizatçısı və innovatoru kimi qiymətləndirilir.
