Sumqayıtda məktəbin ətrafına tikanlı hasar çəkilib.
Sumqayit24.az xəbər verir ki, söhbət 10-cu mikrorayonda yerləşən 28 saylı tam orta məktəbdən gedir.
Görüntüləri redaksiyamıza göndərən vətəndaşın sözlərinə görə, təhsil ocağının ətrafına çəkilən tikanlı məftillərin arasından azyaşlı şagirdlər də keçir. Bu isə onların təhlükəsizliyi ilə bağlı narahatlıq doğurur.
Hasarın hansı səbəbdən çəkildiyini və şagirdlərin təhlükəsizliyi üçün hansı tədbirlərin görüldüyünü öyrənmək məqsədilə Abşeron-Xızı Regional Təhsil İdarəsinə sorğu ünvanlamışıq.
Qurumun mətbuat xidmətindən təqdim etdiyimiz görüntülərə rəğmən bildirilib ki, Polad Həşimov adına 28 nömrəli tam orta ümumtəhsil müəssisəsinin ərazisi barədə yayılan iddialar əsassızdır və həqiqəti əks etdirmir:
"Məktəbin əsas giriş-çıxışı açıqdır, şagird və valideynlərin gediş-gəlişinə heç bir məhdudiyyət yoxdur:
Ərazinin yan hissələrində quraşdırılmış məftilli çəpərlər isə əvvəlki dövrlərdə yaşıllıq sahələrinin zədələnməsi halları nəzərə alınaraq, ağacların, gül kollarının və yeni əkilmiş yaşıllıqların qorunması məqsədilə quraşdırılıb.
Qeyd edirik ki, çəpərlər məktəbə giriş-çıxışa maneə yaratmır və yalnız yaşıllıqların mühafizəsinə xidmət edir".
