Sumqayıt Dövlət Universitetində (SDU) formalaşdırılan “YENİ Klub”un təsis toplantısı keçirilib. Sumqayıt24 bu haqda 4 aprel tarixində xəbər verir.
Tədbir SDU və Yeni Azərbaycan Partiyası (YAP) Gənclər Birliyi tərəfindən təşkil olunub. Sosial məsələlər və ictimaiyyətlə əlaqələr üzrə prorektor, dosent Elmar Xəlilov, YAP Gənclər Birliyinin sədri Bəxtiyar İslamov, sədr müavini Fəsli Nəbiyev və tələbə heyəti əvvəllcə ulu öndər Heydər Əliyevin foyedəki büstü önünə gül dəstələri düzüblər.
Təsis toplantısını açan dosent Elmar Xəlilov “YENİ Klub” un önəmli təşəbbüslər irəli sürərək faydalı layihələr reallaşdıracağına inandığını bildirib: “Bu gün Azərbaycan gənclərinin dünyagörüşü daha fərqlidir. O, dünyada gedən proseslərə yaxşı bələd olmağı ilə bərabər, yüksək təhliletmə qabiliyyətinə malikdir”.
Çıxışını davam edən prorektor “YENİ klub”un tələbələrin ictimai-sosial aktivliyini artıracağına, şəxsi inkişafına töhfə verəcəyinə inandığını vurğulayıb: “Bildiyiniz kimi, biz üçüncü ildir ki, qalib xalq kimi yaşayırıq və bu, həmişə belə olacaq. Siz tələbələr öz uğurlarınız, bilik və bacarığınızla bu qələbəni çoxşaxəli etməli, böyütməli və yaşatmalısınız. “YENİ klub”un fəaliyyətində də məhz dövlətçilik, vətənpərvərlik kimi yüksək dəyərlərin təbliğ olunacağına əminəm”.
Sonra Klubun rəhbəri, Tarix və coğrafiya fakültəsinin tələbəsi Songül Kərimzadə layihə barədə ətraflı məlumat verib. Klubun ali təhsil müəssisəsi daxilindəki digər təşkilatlarla birgə fəaliyyət həyata keçirəcəyini, yarış, müsabiqə, layihə, debat, diskussiya, təlim, həmçinin xarici dillərdə tədbirlər təşkil edəcəyini, tələbələrin həyatında müsbət mənada rol oynayacağına inandığını bildirib.
