Sumqayıt Dövlət Universitetində (SDU) “Bilik yarışı” keçirilib. Sumqayıt24 bu haqda 29 aprel tarixində xəbər verir.
Tədbir İqtisadiyyat və idarəetmə fakültəsində Maliyyə və mühasibat uçotu, həmçinin İqtisadiyyat kafedraları tərəfindən Lalə Vəliyevanın moderatorluğu ilə təşkil olunub.
İlk növbədə Pay+i+tax”, “Viktoriya”, “Xarıbülbül”, “Gənc iqtisadçılar”, “Zirvə” komandaları səhnəyə çıxıb. Tələbələrin şeir və mahnıları bilik yarışına rəng qatıb.
Yarış ev tapşırığı mərhələsi ilə davam edib. Hər komandadan bir tələbə “Heydər Əliyev və Azərbaycan iqtisadiyyatı” mövzusu üzrə slaydlar təqdim edib.
Münsiflər heyətinin üzvləri: İqtisadiyyat və idarəetmə fakültəsinin dekanı, dosent Aynurə Yəhyayeva, Maliyyə və mühasibat uçotu kafedrasının müdiri, dosent Loğman Abdullayev, Dünya iqtisadiyyatı və marketinq kafedrasının müdiri, dosent Məlahət Pənahəliyeva, İqtisadiyyat kafedrasının müdiri, dosent Lalə Mahmudova, Biznesin təşkili və menecment kafedrasının müdiri, dosent Qalib Hüseynov tələbələrin çıxışlarına münasibət bildiriblər.
Sonda qalib komandalar mükafatlandırılıblar.
