Sumqayıt Dövlət Universitetində (SDU) yeni təyinatlar baş tutub.
Sumqayit24.az xəbər verir ki, Xəyalə Seyfullayeva Riyazi analiz və difetensial tənliklər kafedrasının, Tünzalə Babayeva isə Kimya mühəndisliyi və ekologiya kafedrasının müdiri vəzifələrinə təyin olunublar.
Yeni kafedra müdirlərinin tərcümeyi-halı:
Xəyalə Seyfullayeva 2001-ci ildə Astara Pedaqoji Texnikumunu İbtidai təhsil ixtisası üzrə bitirib. 2000-2002-ci illərdə Lerik rayonu Vizəzəmin kənd orta məktəbində ibtidai sinif müəllimi işləyib. 2006-cı ildə Sumqayıt Dövlət Universitetinin bakalavriat səviyyəsini Riyaziyyatçı, riyaziyyat müəllimi, 2009-cu ildə magistratura səviyyəsini Riyazi analiz ixtisaslaşması üzrə fərqlənmə diplomu ilə bitirib. 2011-ci ildə Sumqayıt Dövlət Universitetində fəlsəfə doktoru proqramı üzrə doktoranturaya qəbul olub və 2017-ci ildə Bakı Dövlət Universitetində dissertasiya işi müdafiə edib riyaziyyat üzrə fəlsəfə doktoru elmi dərəcəsi alıb, 2021-ci ildən isə eyni ixtisasdan elmlər doktoru proqramı üzrə doktorantdır və doktorluq dissertasiyası üzərində işləyir. 2006-cı ildən Sumqayıt Dövlət Universitetinin Diferensial tənliklər və optimallaşdırma kafedrasında laborant, baş laborant, müəllim, baş müəllim və dosent kimi əmək fəaliyyətini davam etdirib. 50-dən çox elmi məqalə və tezisin, 2 dərs vəsaiti və 5 fənn proqramının müəllifidir.
Tünzalə Babayeva 2003-2008-ci illərdə Azərbaycan Dövlət Pedaqoji Universitetinin “Biologiya” ixtisasında bakalavr təhsilini bitirib. 2009-cu ildən Azərbaycan Texniki Universitetinin “Ekologiya” ixtisası üzrə magistratura proqramına qəbul olub, 2011-ci ildə dissertasiya müdafiə edərək təhsilini tamamlayıb.
2012-ci ildən SDU-nun Ekologiya kafedrasında assistent, 2019-cu ildən isə baş müəllim vəzifəsində çalışıb. 2013-2017-ci illərdə Ekologiya və Təbii Sərvətlər Nazirliyinin Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinin doktorantı olub, 2022-ci ildə isə aqrar elmləri üzrə fəlsəfə doktoru dərəcəsi alıb.
2023-cü ildə Elm Fondunun Qrant müsabiqəsinin qalibidir.
