Sumqayıt Dövlət Universiteti (SDU) ilə Azərbaycan Dövlət Neft Şirkətinin (SOCAR) müəssisələri arasında anlaşma memorandumları imzalanıb. Sumqayıt24 bu haqda 19 aprel tarixində xəbər verir.
SOCAR və təhsil ocağının rəhbər heyətinin iştirakı ilə universitetdə tədbir keçirilib. SDU və Bakı Ali Neft Məktəbi, həmçinin SDU və “SOCAR Downstream Management” MMC arasında memorandumlar bağlanılıb.
Bildirilib ki, sazişlər ölkəmizdə rəqabətli insan kapitalının, habelə yüksək ixtisaslı kadr potensialının gücləndirilməsinə dəyərli töhfə verəcək. Həmçinin “Heydər Əliyev və Azərbaycanın yeni neft strategiyası” mövzusunda mühazirələrdən birinin SDU-da keçirilməsinə dair razılıq əldə olunub.
Görüş çərçivəsində SOCAR-nin keçirdiyi təhsil proqramlarının əhəmiyyəti vurğulanıb, yüksək bilik və bacarıqları ilə seçilən gənclərin şirkətdə işlə təmin olunduğu qeyd olunub.
Həmçinin təlim, tədris, istehsalat təcrübəsi və elmi-tədqiqat sahələrində əməkdaşlıq imkanları nəzərdən keçirilib, müxtəlif mövzular ətrafında fikir mübadiləsi aparılıb.
