Sumqayıt Dövlət Universiteti (SDU) ilə Malatya Turgut Özal Universiteti (MTÜ) arasında akademik əməkdaşlıq çərçivəsində iqlim dəyişikliyi ilə mübarizə və dayanıqlı kampusların inkişafına yönəlmiş birgə layihə COP31-də təqdim olunub.
Sumqayit24.az xəbər verir ki, COP31-in Yaşıl Zonasında yerləşən Academic Pavilion-da MTÜ-nün stendində keçirilən təqdimatda iki universitetin enerji və ətraf mühitin idarə olunması sahəsində birgə fəaliyyəti, elmi-tədqiqat istiqamətləri və innovativ təşəbbüsləri barədə məlumat verilib.
Əməkdaşlıq çərçivəsində iki əsas istiqamət – enerji idarəetməsi və ətraf mühitin idarə olunması müəyyənləşdirilib. Enerji idarəetməsi üzrə MTÜ-də tətbiq olunan enerji monitorinq sisteminin SDU-da da qurulması, elektrik enerjisi istehlakının təhlili və gələcəkdə süni intellekt əsaslı qərar dəstəyi sisteminin yaradılması nəzərdə tutulur.
Ətraf mühitin idarə olunması istiqamətində isə SDU-da layihələndirilən "Ağıllı Bağban" (Bagban Robot) sisteminin prototipinin hazırlanması planlaşdırılır. Süni intellekt, sensorlar, dron və avtonom idarəetmə texnologiyalarına əsaslanan sistem kampusların yaşıllıq sahələrində suvarma, otbiçmə və digər qulluq işlərinin avtomatlaşdırılmasına, resurslardan səmərəli istifadəyə xidmət edəcək.
Layihə SDU tərəfindən professor Cavanşir Məmmədov və dosent Nadir Hacıbabayevin elmi rəhbərliyi ilə həyata keçirilir. MTÜ tərəfindən koordinasiyanı dosent Ozan Akdağ təmin edir.
Təqdimatda Türkiyə Ali Təhsil Şurasının üzvü, professor Derviş Karaboğaya birgə layihələr barədə məlumat verilib. O, süni intellektin enerji və ətraf mühitin idarə olunmasında tətbiqini müsbət qiymətləndirib.
Qeyd edək ki, 2027-ci ilin sonunadək davam etdirilməsi nəzərdə tutulan əməkdaşlıq çərçivəsində birgə elmi məqalələrin hazırlanması, beynəlxalq layihələrə müraciətlərin edilməsi, akademik səfərlərin və tələbə-müəllim mübadiləsinin təşkili planlaşdırılır.