Sumqayıt-Novxanı yolunda fəaliyyət göstərən restoranlardan biri ilə bağlı şikayət var.
Bu barədə Sumqayit24.az-a sakinlər məlumat veriblər.
Vətəndaşların sözlərinə görə, "By Hollywood" restoranında səsləndirilən yüksək musiqi ətrafda yaşayan sakinlərin narahatlığına səbəb olur.
Şikayətçilər bildirirlər ki, səs-küy səbəbindən gündəlik həyatlarında istirahət etmək mümkünsüz bir məsələyə çevrilib. Onların iddiasına görə, yüksək musiqi səhər saat 6-dan başlayır və axşam saatlarında da davam edir.
Məsələ ilə bağlı Dövlət Ekoloji Təhlükəsizlik Xidməti Sumqayit24.az-a açıqlama verib.
"Sumqayıt-Novxanı yolunun kənarında yerləşən "By Hollywood" restoranından gələn səs-küy və fişəng səsləri ilə bağlı Dövlət Ekoloji Təhlükəsizlik Xidmətinə daxil olan şikayət 4 saylı Regional Ekologiya və Təbii Sərvətlər İdarəsinin və Ətraf Mühitin Çirklənməsinin Monitorinq Qrupunun əməkdaşları tərəfindən yerində araşdırılıb.
Aparılan ölçmə işləri zamanı obyektdən ətrafa yayılan səs-küy səviyyəsinin ətraf mühit üçün yol verilən norma həddində olduğu müəyyən edilib", - deyə məlumatda qeyd olunub.
