Sumqayıtda iki şəhid, gizirlər Mehrab Niftəliyev və Sübhan Cəbrayılovun xatirəsinə həsr olunmuş lövhələrin açılış mərasimi baş tutub. Bu haqda DünyaTv məlumat yayıb.
Lövhələr Əziz Əliyev adına Sumqayıt Tibb kollecinin həyətində quraşdırılıb. Açılış mərasimində Sumqayıt İcra Hakimiyyətinin başçısının birinci müavini Teymur Səmədov, şəhidlərin həyat yoldaşları və tibb kollecinin kollektivi iştirak edib. Tədbirdə şəhidlərin xatirəsi bir dəqiqəlik sükütla yad edilib, daha sonra iştirakçılara onların 44 günlük “Vətən müharibəsi”ndə göstərdiyi cəsarət və qəhrəmanlıqlar barədə məlumat verilib.
Sübhan Cəbrayılov Cəbrayıl, Füzuli və Qubadlı rayonu istiqamətlərində, həmçinin Ərgünəş dağı və Hadrut qəsəbəsi istiqamətlərində gedən döyüşlərdə savaşmışdır. 19 oktyabr tarixində Qubadlı rayonu istiqamətində şəhid olub. O ölümündən sonra, Prezidentin sərəncamı ilə "Vətən Müharibəsi Qəhrəmanı", "Vətən uğrunda", Cəbrayılın, Füzulinin və Xocavəndin azad olunmasına görə medalları ilə təltif olunub.
Ölümündən sonra "Vətən Müharibəsi Qəhrəmanı", "Vətən uğrunda", Cəbrayılın, Füzulinin və Şuşanın azad olunmasına görə medalları ilə təltif olunmuş Mehrab Niftəliyev Füzulinin, Cəbrayılın və Şuşanın azadlığı uğrunda gedən döyüşlərdə savaşmışdır. Noyabrın 8-də Şuşa döyüşləri zamanı şəhid olub.
Hər iki şəhid Sumqayıt Şəhidlər xiyabanında dəfn olunub.
