Bakının mərkəzinə gəlmək bir az da çətinləşib.
İqtisadçı ekspert Razi Abbasbəyli məsələ ilə bağlı deyib ki, paytaxtın mərkəzində sürətlə söküntü işləri aparılır. Söküntüdən sonra insanlara verilən konpensasiyalar 1 kvadratmetrə görə 1500-2000 manatdır:
“Mərkəzdə 40-50 kvadratmetr mənzili olan şəxs söküntüdən sonra 70-80 min manat konpensasiya alır.
Bu vəsait insanlara mərkəzdən mənzil almaq üçün yetərli deyil. Mərkəzdə yeni inşa olunan binalarda ən ucuz mənzilin kvadratı 3500 manatdan başlayır. Təmirsiz olduğuna görə təmir xərclərini də bura əlavə etsək, o zaman evi sökülən vətəndaş şəhər kənarından mənzil axtarışına çıxır”.
O bildirib ki, mərkəzə qismən yaxın olan ərazilər isə Sumqayıt istiqamətidir:
“Bura Masazır, Xırdalan, Saray və Sumqayıt istiqamətidir. Yay aylarında mənzili sökülən vətəndaşlar sürətlə bu istiqamətdən mənzil alır. Nəticədə Bakı-Sumqayıt yolu hər il bir qədər də artıq yüklənir. Proses belə davam edərsə, bir neçə ildən sonra bu yolda hərəkət təmamilə iflic olacaq. Ona görə də yeni bir strateji plan düşünülməlidir”.
Ekspert ən azı Sumqayıt istiqamətindən mərkəzə doğru alternativ yol çəkilməsini təklif edir.
