Ələt Azad İqtisadi Zonasının (AFEZ) səlahiyyətli qurumunun idarə heyətinin sədri Valeh Ələsgərov Sumqayıt Kimya Sənaye Parkında olub. Sumqayıt24 bu haqda 14 iyun tarixində xəbər verir.
Tanışlıq səfərində sənaye parklarının rezidentlərinin nümayəndələri iştirak ediblər. İqtisadi Zonaların İnkişafı Agentliyinin (İZİA) idarə heyətinin sədri Elşad Nuriyev sənaye zonalarında investorlar üçün yaradılan imkanlar, İZİA ilə AFEZ arasındakı əməkdaşlıq perspektivlərindən danışıb.
Ələt Azad İqtisadi Zonasının səlahiyyətli qurumunun idarə heyətinin sədri Valeh Ələsgərov AFEZ iqtisadi zonada rezidentlərin qeydiyyat prosedurları, investorlar üçün tətbiq olunan fiskal və qeyri-fiskal imtiyazlardan söz açıb, sənaye zonalarının rezidentlərini AFEZ-nin rezidentləri ilə əməkdaşlıq əlaqələri qurmağa dəvət edib.
Görüş çərçivəsində İZİA ilə AFEZ arasında təcrübə mübadiləsinin aparılması, İZİA-nın idarəçiliyində olan sənaye zonalarının məlumat lövhəsinin Ələt Azad İqtisadi Zonasında yerləşdirilməsi və s. məsələlər müzakirə edilib.
Sonda sədr Valeh Ələsgərov Sumqayıt Kimya Sənaye Parkında görülmüş işlərlə, "STP” MMC-nin Elektrik avadanlıqları və Kabel zavodlarında gedən istehsal prosesi ilə tanış olub.
