Ədliyyə Nazirliyi və Sumqayıt Apellyasiya Məhkəməsi tərəfindən “Heydər Əliyev mütərəqqi məhkəmə-hüquq islahatlarının müəllifidir” mövzusunda konfrans keçirilib. Sumqayıt24 bu haqda 18 aprel tarixində xəbər verir.
Tədbirdə nazirliyin məsul işçiləri, Sumqayıt apellyasiya və birinci instansiya məhkəmələrinin hakimləri, məhkəmə aparatının əməkdaşları, Bakı Dövlət Universiteti (BDU) Hüquq fakültəsinin, Sumqayıt Dövlət Universitetinin (SDU) rəhbərliyi və çoxsaylı tələbələr iştirak ediblər.
Əvvəlcə ulu öndərin abidəsi ziyarət olunub, önünə gül dəstələri qoyulub. Həmçinin gənclər Heydər Əliyev Mərkəzində onun həyat və fəaliyyətini əks etdirən maraqlı ekspozisiyalarla tanış olub, filmə baxıblar.
Sumqayıt Məhkəmə Kompleksində davam edən tədbiri Ədliyyə Nazirliyi İnsan hüquqları və kommunikasiya idarəsinin rəisi Aynur Sabitova açıb. O, bildirib ki, Heydər Əliyevin tükənməz irsi daim öyrənilməli və ondan bəhrələnilməlidir.
Sumqayıt Apellyasiya Məhkəməsinin sədri Tofiq Paşayev məhkəmə sisteminin təkmilləşdirilməsi üzrə aparılan ardıcıl tədbirlər və yeniliklərdən danışıb.
Konfrans çərçivəsində gənclər Sumqayıt Məhkəmə Kompleksində yaradılan müasir şəraitlə, ictimai və inzibati zonalar, məhkəmə iclas zalları, hakimlər üçün və digər otaqlarla, “Elektron məhkəmə” informasiya sistemi və tətbiq edilən rəqəmsal innovasiyalarla yaxından tanış olublar.
Sonda onların sualları cavablandırılıb, maraqlı diskussiyalar aparılıb.
