Xəbər verdiyimiz kimi, sumqayıtlı məşqçinin daha bir tələbəsi Avropa çempionatına buraxılmayıb.
Belə ki, Fərid Ağakişiyevin tələbəsi İlkin Nəsibov tibbi təsnifata görə gözlərində problem olmadığı aydın olub.
Məsələ ilə bağlı sözügedən məşqçi Sumqayit24.az-a açıqlama verib.
O bildirib ki, qanunlara görə əlilliyi olan şəxs Paralimpiya Oyunlarında iştirak üçün uyğun olmaya bilər.
"Uzun illərdir ki, Sumqayıt Paralimpiya Mərkəzində görmə əngəlli uşaqlara, oğlan və qızlara cüdo idman növündə dərslər keçirəm. Görmə əngəlli uşaqlar müvafiq sənədləri, görməsi ilə bağlı əlilliyi, tibbi rəyləri və eləcə də sağlamlığı ilə bağlı həkim rəyini təqdim etdikdən sonra məşqlərə buraxılır və biz də qəbul edirik. Ola bilsin ki, dövlət tərəfindən verilən tibbi sənədlə paracüdoda tələb olunan tibbi sənəd üst-üstə düşmür. Biz həmin sənədə əsaslanaraq onlara məşq keçirik. Burada şəxsi məşqçinin heç bir günahı yoxdur.
Sözügedən İlkin Nəsibov da Əmək və Əhalinin Sosial Müdafiəsi Nazirliyi qurumlarının təyin etdiyi 2-ci qrup görmə əlilliyi olan təqaüdçüdür. 9 yaşından etibarən bizim mərkəzdə məşqlərə başlayıb və dəfələrlə Uşaq Paralimpiya Oyunlarının qalibi olub. Bu cür görmə əlilliyi olan uşaqların tərəfimizdən cəmiyyətə inteqrasiyası ücün, həyat eşqi ilə yaşamaqları, depressiyaya düşməməkləri, özlərinə qapanmamaları və kollektivdə böyümələri üçün var gücümüzlə çalışırıq”, - deyə məşqçi bildirib.
O, qeyd edib ki, İlkinin yarışa buraxılmamasına səbəb təsnifata lazım olan sənədlərin tam olmaması olub:
“Milli Paralimpiya Komitəsi Beynəlxalq Görmə Məhdudiyyətli İdmançılar Assosiasiyasına (IBSA) İlkin Nəsibovu Tbilisidə beynəlxalq təsnifatdan keçməsi üçün müraciət edib idmançını Avropa çempionatına apardı. O, ilk dəfə təsnifatda iştirak etdiyi üçün lazım olan sənədlərin tam olmadığı məlum oldu və yarışa buraxılmamasına qərar verildi. Növbəti təsnifata müraciət etmək üçün isə tam şəkildə sənədlərinin hazırlanması bildirildi”.
Fərid Ağakişiyev sonda bildirib ki, tibbi təsnifat, paracüdo qaydalarına dəyişikliklər, həkim rəyləri – bu kimi məsələlər şəxsi məşqçilərin məsuliyyəti deyil.
