Sumqayıtda ağacların kəsilərək yerində metal köşkün quraşdırılması ilə bağlı iddia təsdiqini tapıb.
Sumqayit24.az-a bu barədə Dövlət Ekoloji Təhlükəsizlik Xidmətindən məlumat verilib.
Qurumdan bildirilib ki, Sumqayıt şəhəri, 9-cu mikrorayon ərazisində ağacların kəsilməsi ilə bağlı Dövlət Ekoloji Təhlükəsizlik Xidmətinə daxil olan şikayət 4 saylı Regional Ekologiya və Təbii Sərvətlər İdarəsinin əməkdaşları tərəfindən yerində araşdırılıb.
"Araşdırma zamanı ərazidə 4 ağacın qanunsuz kəsildiyi və nəticədə təbiətə 1920 manat məbləğində ziyan dəydiyi müəyyən olunub. Faktla bağlı akt tərtib edilib.
Eyni zamanda, ağacların kəsildiyi ərazidə metal köşkün yerləşdirildiyi müəyyən olunub.
Köşkün ərazidən götürülməsi və yeni ağacların əkilməsi məqsədilə Sumqayıt Şəhər İcra Hakimiyyətinə, təqsirkar şəxslərin tapılması üçün Sumqayıt şəhər Polis İdarəsinə, ərazinin mülkiyyətçisinin müəyyən edilməsi məqsədilə Əmlak Məsələləri Dövlət Xidmətinə müraciət olunub", - deyə açıqlamada qeyd olunub.
Xatırladaq ki, redaksiyamız ötən gün - oktyabrın 29-da adıçəkilən ərazidə ağacların kəsilərək yerində metal konstruksiyanın quraşdırılması ilə bağlı sakinlərin şikayətini işıqlandırıb.
Qeyd edək ki, Sumqayıtın 13-cü mikrorayonunda, Babək küçəsində də oxşar hal qeydə alınıb. Belə ki, ərazidə 8 ağacın qanunsuz kəsilərək yerində metal köşkün quraşdırıldığı və nəticədə təbiətə 5 100 manat məbləğində ziyan dəydiyi müəyyən olunub.
***
Sumqayıtda ağacların kəsilərək yerində metal konstruksiyanın quraşdırıldığı iddia olunur.
Sumqayit24.az-a bu barədə 9-cu mikrorayon sakinləri məlumat veriblər.
Vətəndaşların iddiasına görə, 14 saylı binanın arxasında kiçik ağaclar kəsilərək ərazidə obyekt quraşdırılıb.
Sakinlər bildirirlər ki, bu hal həm yaşıllıqların məhv edilməsinə, həm də ərazinin görünüşünün korlanmasına səbəb olur.
"Bu obyekt əvvəl 24 saylı binanın arxasında idi. Obyektin yerləşdiyi yerdə su xəttində problem yarandığı üçün bura gətirilib", - deyə şikayətçilər idda ediblər.
Məsələ ilə bağlı Sumqayıt şəhər İcra Hakimiyyətinə və Dövlət Ekoloji Təhlükəsizlik Xidmətinə sorğu ünvanlanıb.
