Fransada Sumqayıt hadisələri mövzusunda dəyirmi masa keçirilib. Sumqayıt24 bu haqda 30 mart tarixində Report.az-a istinadən xəbər verir.
Hüquqşünas, sabiq prokuror Aslan İsmayılovun "Sumqayıt, SSR-nin süqutunun başlanğıcı" adlı kitabının təqdimatına həsr olunmuş tədbir Parisdə baş tutub. Burada fransalı professorlar, jurnalistlər, tarixçilər, diplomatlar, vətəndaş cəmiyyətlərinin üzvləri və digər şəxslər iştirak ediblər.
Fransa-Azərbaycan Dialoqu Assosiasiyası tərəfindən təşkil olunan dəyirmi masada müəllif Sumqayıt hadisələrinə dair prokuror qismində çıxış etdiyi proseslərdən danışıb.
A. İsmayılov Sumqayıt hadisələrinin təşkilatçılarının ermənilər olduğunu və əhali arasına yerləşdirilən, Azərbaycan dilini təmiz bilən ermənilərdən ibarət təxribatçı qrupların xüsusi rol oynadığını bildirib.
Tədbir zamanı iştirakçılar hüquqşünasa Sumqayıt hadisələri, SSRİ-nin süqutunun ilk illəri baş verən proseslər barədə suallar veriblər.
Qeyd edək ki, kitab fransız dilində "Visible" nəşriyyatı tərəfindən çap olunub.
