Sumqayıtda şəhər İcra Hakimiyyəti yanında yaradılmış Əlaqələndirmə Mərkəzinin növbəti iclası keçirilib. Sumqayıt24 bu barədə 3 oktyabr tarixində şəhər İcra Hakimiyyətinə istinadən xəbər verir.
Şəhid ailələri üzvləri, müharibə ilə əlaqədar xəsarət almış hərbi qulluqçular və əlilliyi müəyyən edilmiş şəxslərin məşğulluğuna və sosial problemlərinin həllinə dəstək olmaq məqsədilə yaradılmış mərkəzin iclasında İH-nin məsul əməkdaşları, şəhid ailələri və qazilər, eləcə də iş adamları iştirak ediblər. Tədbirdə çıxış edən Mərkəzin rəhbəri Gündüz Əliyev bildirib ki, ötən dövr ərzində məşğulluğun təmin olunması istiqamətində ciddi addımlar atılıb, müsbət nəticələr əldə olunub. Bir sıra problemlər aradan qaldırılıb.
O bildirib ki, Sumqayıt şəhər Şəhidlər Xiyabanında 515 şəhid dəfn olunub ki, onlardan 407-si 1-ci Qarabağ müharibəsi, 106-sı 2-ci Qarabağ müharibəsi, 2-si isə son günlər erməni təxribatı nəticəsində həlak olan hərbçilərimizdir. Əlavə olaraq şəhərimizin 8 nəfər şəhidi isə Respublikanın digər rayonlarında və 2-ci Fəxri xiyabanda dəfn olunub. Şəhidlər Xiyabanı əsaslı təmir edilərək qalib əsgərin abidəsi ucaldılıb. 3 orta məktəbə Milli və Vətən müharibəsi qəhrəmanları adı verilmişdir. Polad Həşimovun adını daşıyan 28 saylı orta məktəbdə büstü qoyulmuş və muzeyi yaradılmışdır. Ümumilikdə 38 şəhidin adına küçə verilib.
Gündüz Əliyev əlavə ki, şəhərdə 1-ci Qarabağ Müharibəsi zamanı 1000-ə yaxın, Vətən müharibəsi zamanı isə 200-ə yaxın hərbçimiz müxtəlif əlillik dərəcəsi alıb. Hər bir şəhid ailəsinə birdəfəlik maddi vəsait və ərzaq yardımı olunub. Belə ki, bu tədbirlərin keçirilməsinə cəmi 670.700 manat vəsait xərclənib. Ötən ilin yanvar ayından bu günə kimi şəhid ailələrinə, qazilərə və müharibə iştirakçılarına bayramlarda, əlamətdar günlərdə və özlərinin müraciəti əsasında 345.100 manat məbləğində ərzaq yardımı və 389.600 manat maddi yardım verilib.
Vurğulanıb ki, Sumqayıt şəhər İcra Hakimiyyəti tərəfindən son illər 618 nəfər şəhid ailəsi və qazi uçota götürülüb. Onlardan 385 nəfər yeni mənzillə təmin olunub. Ötən dövr ərzində 233 şəhid ailəsi və qazi işlə təmin olunub. Tam fiziki hərəkətləri məhdud olan 27 qazimiz Əlaqələndirmə Mərkəzi tərəfindən himayəyə götürülüb. Sumqayıt şəhidləri haqqında 600 səhifəlik “Seçilmişlər” adlı kitab nəşr olunaraq təqdimatı keçirilib.
