Sumqayıtda baş verən dəhşətli qətlin təfərrüatları məlum olub.
Demokrat.az-ın əldə etdiyi məlumata görə, hadisə 2024-cü ilin dekabrın 26-da H.Z.Tağıyev qəsəbəsi, Xəzri yaşayış massivi ərazisində qeydə alınıb. Belə ki, 1957-ci il təvəllüdlü Sərdar birgə yaşadıqları fərdi yaşayış evinin həyətində oğlu Şahmarla ailə-məişət münaqişəsi zəminində mübahisə edib. Bu zaman o, övladını mətbəx bıçağı ilə vurub.
Sərdarın barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib.
İş üzrə ifadə verən Sərdar ona elan olunan ittiham üzrə özünü qismən təqsirli bilib. O, ifadəsində hadisə günü hava qaranlıq olan zaman yaşadığı evin həyətində balıq təmizlədiyini bildirib:
"Digər ailə üzvlərim isə evdə idilər. Evdəkiləri səslədim, lakin mənə cavab verən olmadı. Onların başının telefona qarışdığını düşünərək çöldə olan "Wi-fi"-nin naqillərini əsəbiləşərək kəsmək istədim. Həmin vaxt oğlum Şahmar bu hərəkətimə qarşı çıxanda onu itələdim. Nəticədə ehtiyatsızlıqdan belə bir hadisə baş verdi".
İş üzrə zərərçəkmiş Şahmarın sözlərinə görə, hadisə günü işdən evə gəlib:
"Həmin vaxt atam həyətdə balıq təmzlədiyi üçün əlində bıçaq olub. Onun içkili olduğunu və çox əsəbiləşdiyini gördüm. Əlindən xəta çıxacağını düşündüm və sakitləşdirmək üçün ona yaxınlaşdım. Bu zaman atam əlindəki bıçaqla mənə 2 zərbə yetirdi. Atamın törətdiyi əməl ehiyatsızlıqdan baş verib. Onu bağışlamışam, onunla barışmışam. Valideynimə qarşı şikayətim yoxdur".
Sumqayıt Ağır Cinayətlər Məhkəməsinin hökmü ilə Sərdar 2 il müddətinə azadlıqdan məhrum edilib. Onun cəzasına ümumi rejimli cəzaçəkmə müəssisəsində çəkməsi müəyyən edilib.
