Sumqayıtda kişi ondan ayrılmaq istəyən sevgilisinə maşında kəllə atıb.
Sumqayit24.az-ın əldə etdiyi məlumata görə, hadisə şəhərin 41-ci məhəlləsində baş verib.
İş materiallarına əsasən, təqsirləndirilən Cavid ilə zərərçəkmiş Elnarə təxminən 5 ildir ki, qeyri-rəsmi münasibətdə yaşayırlar. Bir müddət sonra cütlük arasında qısqanclıq səbəbindən problemlər yaranmağa başlayıb.
Qadın Cavidin həddindən artıq qısqanc və kobud olması səbəbindən ondan ayrılmaq qərarına gəlib. Buna görə cütlük arasında maşının salonunda mübahisə yaranıb. Mübahisə zamanı təqsirləndirilən Cavid sevgilisi Elnarəyə baş zərbələri endirib.
Məhkəmə iclasında təqsirləndirilən şəxs özünü təqsirli bilib. O, qadının onu təhqir etməsindən sonra əsəbiləşərək bu hərəkəti törətdiyini, hazırda əməlindən peşman olduğunu bildirib. Təqsirləndirilən şəxs həmçinin zərərçəkmişlə barışdığını və ona dəymiş ziyanı ödədiyini qeyd edib.
Zərərçəkmiş qadın məhkəmədə ifadə verərək hadisədən sonra evə getdiyini, daha sonra atasının polisə məlumat verdiyini bildirib. Qadın hazırda təqsirləndirilən şəxslə barışdığını, ona qarşı heç bir şikayət və tələbinin olmadığını deyib.
Sumqayıt Şəhər Məhkəməsi tərəflərin barışdığını, dəymiş ziyanın ödənildiyini və zərərçəkmiş şəxsin şikayətinin olmadığını nəzərə alaraq cinayət işi üzrə icraata xitam verib.
Əsmər Sənani
