Sumqayıt şəhəri, 20-ci məhəllədə yerləşən yaşayış binasının həyəti çöküb.
Xəzər TV-nin məlumatına görə, ərazidə yaşayan ailələr təşviş içindədilər.
Onlar bildirirlər ki, ərazidən iri kanalizasiya xətti keçir. 1949-cu ildən istifadədə olan kanalizasiya xəttinin istismar müddəti başa çatıb. Bu səbəbdən həmin ərazidə çökmə qeydə alınıb.
Sumqayıt Su Kanal İdarəsindən bildirilib ki, baş verən çökmə hadisəsindən xəbərdardırlar. Sözügedən ünvanda 6 metr dərinlikdən iri kanalizasiya xətti keçir.
Orada yaşayan sakinlərlə bu barədə fərdi söhbətlər aparılıb və ərazi təhlükəli olduğu üçün lentlənib. Ancaq təmir-bərpa işlərinin aparılması üçün ərazinin genişlənməsinə, mövcud ağacların çıxarılmasına və hasarların sökülməsinə ehtiyac yaranıb.
"Aidiyyəti qurumlara bu işlərin görülməsi, həmçinin ərazidə iri texnikaların çalışması üçün şəraitin yaradılması məqsədilə müvafiq müraciət ünvanlanıb. Problemin qısa vaxt ərzində aradan qaldırılması nəzərdə tutulub", - deyə idarədən bildirilib.
