Sumqayıtda yaşayış binasının həyətində yaranan vəziyyət sakinlərin narazılığına səbəb olub.
Sumqayit24.az-a müraciət edən vətəndaşların sözlərinə görə, 9-cu mikrorayonda yerləşən "Kristal Abşeron" yaşayış kompleksinin həyətində hərəkət imkanları getdikcə məhdudlaşır.
Şikayətçilər bildirirlər ki, bəzi sakinlər həyətin müxtəlif hissələrində zəncirlər çəkərək özləri üçün avtomobil dayanacaq yerləri ayırıblar.
"Ərazidə hər tərəf zəncirlənib. Bununla yanaşı, şəkildə gördüyünüz daşdan maneəni də fəhlələr düzəldib. Etirazımı bildirəndə dedilər ki, onları Mənzil Kommunal Təsərrüfatı İstehsalat Birliyindən göndəriblər. Bu cür hallar həm avtomobillərin, həm də piyadaların hərəkətinə ciddi çətinlik yaradır", - deyə sakinlər qeyd ediblər.
Vətəndaşlar aidiyyəti qurumlardan əraziyə baxış keçirilməsini və problemin aradan qaldırılması üçün müvafiq tədbirlərin görülməsini xahiş edirlər.
