Bir müddət Sumqayıtda çalışmış Şadmanov Əkrəm Yunus oğlunun şəhadətindən 2 il ötür.
Sumqayit24.az xəbər verir ki, 1984-cü il martın 1-də dünyaya gələn Əkrəm Şadmanov uşaqlıq illərindən başlayan çətinliklərə baxmayaraq, hərb yolunu seçir. C.Naxçıvanski adına hərbi liseyi və Heydər Əliyev adına Azərbaycan Ali Hərbi Məktəbini fərqlənmə ilə bitirərək Azərbaycan Ordusunun şərəfli zabitlərindən birinə çevrilir.
2023-cü il sentyabrın 24-də Ağdam rayonunun Gülablı kəndi yaxınlığında xidməti vəzifəsini yerinə yetirərkən düşmənin basdırdığı minaya düşüb və şəhidlik zirvəsinə ucalıb. Əkrəm Şadmanov 2-ci Fəxri xiyabanda dəfn olunub. Azərbaycan Respublikasının Prezidentinin sərəncamı ilə ölümündən sonra “Vətənə xidmətə görə” ordeni (III dərəcə) və “Vətən uğrunda” medalı ilə təltif olunub.
Qeyd edək ki, şəhid Əkrəm 2021-ci ilin avqust ayında Hərbi Akademiyanı bitirdikdən sonra Sumqayıt şəhəri ərazisində olan N saylı hərbi hissənin komandir müavini vəzifəsinə təyin olundu. Hərbi hissənin yeni yaradılması ilə əlaqədar olaraq polkovnik-leytenant Əkrəm Şadmanov hərbi hissənin komplekləşdirilməsi, döyüş hazırlığının yüksədilməsi istiqamətində əvəzsiz xidmətlər göstərdi.
Allah rəhmət eləsin!
