Sumqayıtda son illərdə müxtəlif abadlıq layihələri çərçivəsində bir sıra mikrorayon və məhəllələrdə sakinlər üçün daha rahat və müasir mühit yaradılıb. Həyətlərdə uşaq oyun meydançaları, idman qurğuları, oturacaqlar və yaşıllıq zolaqları salınıb, sakinlərin asudə vaxtını keçirməsi üçün əlverişli şərait formalaşdırılıb.
Lakin Sumqayit24.az-a daxil olan müraciətlər göstərir ki, şəhərin bütün həyətləri bu imkanlardan yararlana bilməyib. Müxtəlif ərazilərdən sakinlər həyətlərdə uşaqların oynaya biləcəyi meydançaların olmaması, köhnə və baxımsız vəziyyət, eləcə də abadlaşdırma işlərinin onların yaşadığı ünvanlara çatmaması ilə bağlı şikayətlər edirlər.
Belə müraciətlərdən biri də Sumqayıtın 13-cü mikrorayonu, 7A və 7B binalarının sakinlərindən daxil olub. Onların sözlərinə görə, həyətdə uşaqların oynaya biləcəyi təhlükəsiz meydança yoxdur. Azyaşlılar avtomobillərin, qarajların və torpaq sahələrinin arasında oynamağa məcbur qalırlar ki, bu da həm narahatlıq yaradır, həm də təhlükəsizlik baxımından risklidir.
"Bu məsələ ilə bağlı müxtəlif qurumlara dəfələrlə müraciət etmişik, lakin hələ də nəticə yoxdur. Ümid edirik ki, problemin ictimailəşdirilməsi aidiyyəti qurumların diqqətini çəkəcək və həyətimizdə də abadlaşdırma işləri aparılacaq", – deyə sakinlər bildirirlər.
Qeyd edək ki, Sumqayıtın müxtəlif ərazilərindən oxşar məzmunlu müraciətlər daxil olmaqdadır. Sakinlər yaşadıqları həyətlərdə də uşaqlar üçün təhlükəsiz oyun meydançalarının yaradılmasını və abadlıq işlərinin aparılmasını istəyirlər.
