Sumqayıtda baxımsız, dar küçələr sakinlərdə narahatlıq yaradıb.
Sumqayit24.az-a daxil olan məlumata görə, şəhid Elçin Cəbrayılov küçəsinin vəziyyəti olduqca acıncaqlıdır.
Vətəndaşların sözlərinə əsasən, sözügedən yerdə maşınların hərəkəti qeyri-mümkündür.
“Əvvələr bu ərazidə iritutumlu yük maşınları belə hərəkət edə bilirdi. Lakin, indi qeyri-mümkündür. Bir gün burada hər hansı sakinin evi yansa, yanğınsöndürən maşın əraziyə necə daxil olacaq? Ev yanıb kül olsa, kim məsuliyyət daşıyacaq?”, - deyə sakinlərdən biri narahatlığını ifadə edib.
Şikayətçilər iddia edirlər ki, müxtəlif qurumlara məsələ ilə bağlı şikayət edilib.
“Vəziyyəti İcra Hakimiyyətinə bildirdik, onlar bizi bələdiyyəyə yönəltdilər. Həmin quruma da müraciət etdik, hələ ki problemlə bağlı heç bir dəyişiklik yoxdur”, - deyə şikayətçi qeyd edib.
Sakinlər aidiyyəti qurumlardan problemin tezliklə həll edilməsini tələb edirlər.
