Dövlət Gömrük Komitəsi (DGK) “Az-Kom Servis” MMC-yə cərimə yazıb.
İqtisadiyyat.az-ın məlumatına görə, Sumqayıt Kimya Sənaye Parkının rezidenti malların emal edilməsi qaydasını pozduğuna görə ittiham olunur.
Belə ki, şirkət barəsində İnzibati Xətalar Məcəlləsinin 497-ci maddəsinə əsasən cərimə protokolu tərtib edilib. Sənəd baxılması üçün Sumqayıt Şəhər Məhkəməsinə göndərilib və iş hakim Zaur Hacıyevin icraatına verilib.
Protokol tərtib olunan maddədə deyilir ki, malların emal edilməsi qaydasının pozulmasına, yəni icazə olmadan malın emal edilməsi, onların emal edilməsi qaydası və müddətləri, emal məhsullarının hasilat (orta hasilat) norması, emal məhsullarının digər mallarla əvəz edilməsi, dəyişdirilməsi, bu cür malların emal edilməsi üzrə əməliyyatlar aparılması üçün müəyyən olunmuş tələblərə, məhdudiyyətlərə və şərtlərə əməl olunmamasına görə inzibati xətanın bilavasitə obyekti olan malların dəyərinin 30-80%-dək məbləğdə cərimə edilir.
Qeyd edək ki, “Az-Kom Servis” 2011-ci ildə yaradılıb. Şirkət Sumqayıt Kimya Sənaye Parkının ərazisində tullantı yağının təkrar emalı ilə məşğuldur.
