Sumqayıt Dövlət Universitetində (SDU) “Heydər Əliyev və türk dünyası: ictimai, iqtisadi və mədəni əlaqələr” mövzusunda Beynəlxalq elmi konfrans öz işinə başlayıb. Sumqayıt24 bu haqda 5 may tarixində xəbər verir.
Onlayn konfransda Azərbaycan universitetləri ilə yanaşı, Türkiyə, Rusiya, Özbəkistan, Qazaxıstan, Qırğızıstan və digər ölkələrin aparıcı təhsil ocaqlarının alimləri də iştirak ediblər. İlk növbədə onlar ulu öndər Heydər Əliyevin həyat və fəaliyyəti barədə videoçarx izləyiblər.
Elm və innovasiyalar üzrə prorektor, professor Ramazan Məmmədov ümummilli liderin türkdilli xalqların maraqları, Azərbaycanın mənafeyi naminə strateji işlər gördüyündən, həmçinin regionda irimiqyaslı layihələrin reallaşdırılmasında, türk dünyası ölkələri arasında birliyin möhkəmlənməsində xidmətlərindən danışıb.
Ardınca professor Ramazan Məmmədov “Azərbaycanda dövlət dil siyasətinin Heydər Əliyev mərhələsi”, Hacəttəpə Universitetinin professoru, SDU-nun Fəxri Doktoru Şükrü Akalın “Haydar Aliyevin söz varlığı üzerine araştırmalar”, Dağıstan Dövlət Pedaqoji Universitetinin professoru İmperiyat Xalipayeva “Dağıstan-Azərbaycan mədəni əlaqələri”, Acıniyaz adına Nukus Dövlət Pedaqoji İnstitutunun dosenti Irıstı Kuttımuratova “Abay yaradıcılığı və türk xalqlarının mənəvi dəyərləri”, Jusup Balasaqın adına Qırğızıstan Milli Universitetinin dosenti Bəqayım Jaliyeva “Heydər Əliyevin Qırğızıstan-Azərbaycan mədəni əlaqələrinin inkişafına töhfəsi” mövzularında çıxış ediblər.
